Kumitati
Korpijiet u/jew kumitati awtonomi maħtura uffiċjalment
Waqt li jaġixxi b'mod indipendenti, il-Kumitat Reviżorju jeżamina u jiddeċiedi dwar oġġezzjonijiet għal deċiżjonijiet meħuda skont il-politiki u l-kriterji tal-Awtorità u jistabbilixxi jekk il-każ jistħoqqlux eżenzjoni minħabba raġunijiet umanitarji u/jew raġunijiet ġustifikabbli oħra.
Il-Kumitat tal-Verifika huwa stabbilit mill-Bord tad-Diretturi u jirrapporta lilu. Waqt li jaġixxi b'mod indipendenti, il-Kumitat jassisti lill-Bord fir-responsabbiltajiet ta' sorveljanza tiegħu għall-governanza interna, il-kontrolli interni, ir-rapporti finanzjarji, il-ġestjoni tar-riskju u l-funzjoni tal-verifika interna tal-Awtorità.
Il-Bord tad-Diżabilità għandu l-għan li jiskrutinja u jivverifika jekk l-applikanti għall-iskemi tal-Persuni b’Diżabilità u l-Installazzjoni tal-Lift jixirqilhomx assistenza finanzjarja minħabba l-problemi ta’ mobilità tagħhom jew mod ieħor. Dawn l-applikazzjonijiet kollha jiġu vvalutati minn Terapista(i) Okkupazzjonali estern(i).
Ir-rwol primarju tal-Kumitat tal-Allokazzjonijiet u Ad-Hoc huwa li jirrevedi u jivvaluta t-talbiet kollha relatati mal-allokazzjonijiet, l-iskambji u r-rikonoxximenti proposti għall-akkomodazzjoni soċjali. Dan il-kumitat huwa responsabbli wkoll għall-evalwazzjoni u d-deċiżjoni dwar l-iżgumbramenti proposti ta’ persuni li jokkupaw proprjetajiet tal-akkomodazzjoni soċjali illegalment.
L-għan ewlieni tal-Bord tal-Fond għall-Iżvilupp tad-Djar huwa li jiżgura li jinħolqu soluzzjonijiet ħolistiċi għall-akkomodazzjoni soċjali bis-saħħa ta' servizzi u faċilitajiet, filwaqt li jilħqu l-ħtiġijiet kemm tal-komunità kif ukoll tal-individwu. Il-Bord tal-Amministraturi jservi bħala korp konsultattiv għall-Awtorità tad-Djar dwar kwistjonijiet relatati ma’ proġetti komunitarji fl-akkomodazzjoni soċjali filwaqt li huwa l-punt ta' kuntatt ma’ partijiet terzi interessati li jikkollaboraw mal-Awtorità.
Il-liġi dwar il-Kiri tar-Residenzi Privati stabbilixxiet mekkaniżmu ġdid biex toffri rimedju aktar aċċessibbli lill-inkwilini u lis-sidien li għandhom kuntratt tal-kiri rreġistrat mal-Awtorità tad-Djar. Skont il-Kapitolu 604 tal-Liġijiet ta’ Malta, il-partijiet jistgħu jissottomettu talba dwar tilwimiet żgħar—bħal kwistjonijiet relatati mad-depożiti u l-manutenzjoni—li ma jaqbżux il-valur ta’ €5,000.
Il-bord jipprovdi rimedju rapidu u aċċessibbli, partikolarment f’każijiet fejn is-sidien jonqsu milli jissodisfaw l-obbligi ta’ manutenzjoni, iżommu depożiti b’mod inġustifikat, jew fejn l-inkwilini jitilqu mill-proprjetà u jħalluha f'kundizzjoni mhux xierqa bil-ħsarat. Dan il-mekkaniżmu jsaħħaħ aktar il-pożizzjoni tal-Awtorità tad-Djar fis-suq bħala regolatur li jippromwovi kundizzjonijiet ekwi għal kulħadd.
Dan il-kumitat jagħmel intervisti għax-xogħol għall- postijiet vakanti fi ħdan l-Awtorità. Għandu wkoll l-irwol li jieħu d-deċiżjonijiet f'dak li għandu x'jaqsam ma' kwistjonijiet dixxiplinarji li jikkonċernaw lill-membri tal-persunal.