L-Awtorità tad-Djar ippubblikat studju estensiv bħala parti mid-dedikazzjoni tagħha biex tesplora d-dinamika diversa tas-Suq tal-Kiri Malti. Dan l-istudju, b'mod partikolari, ifittex li jifhem b'mod komprensiv in-natura demografika u soċjoekonomika tal-kerrejja u s-sidien tal-kera f'Malta u n-natura tar-relazzjoni bejniethom. Filwaqt li l-Awtorità diġà ppubblikat firxa wiesgħa ta' riċerka dwar dan is-settur, dan l-istudju huwa bbażat fuq stejjer u esperjenzi diretti tal-kerrejja u s-sidien tal-kera nfushom u huwa maħsub biex ikejjel il-livelli ta' sodisfazzjon u għarfien tagħhom wara l-introduzzjoni tar-riforma tal-kera fl-2020.
L-istudju involva ġbir ta' dejta primarja mill-inkwilini u s-sidien b'intervistar bit-telefown assistit minn kompjuter. B'kollox ġew intervistati 800 parteċipant, li jikkonsistu f'400 inkwilin u 400 sid, magħżula b'mod każwali mir-reġistru tal-kera residenzjali. L-istudju huwa miktub b'mod konġunt minn ekonomisti mill-Awtorità tad-Djar, l-Università ta' Malta, u l-Bank Ċentrali ta' Malta.
Dawn huma 7 Osservazzjonijiet Ewlenin li ħarġu mill-istudju.
1. Madwar 97% tas-sidien huma Maltin
L-età medja tas-sidien f'Malta taqbeż dik tal-popolazzjoni ġenerali u kważi terz minnhom huma rtirati. Sidien ta' aktar minn 50 sena jimmaniġġjaw żewġ terzi tal-istokk tal-kiri residenzjali.
2. Id-dħul medjan gross mill-kiri għas-sidien kollha kien ta' €12,000
Erba' minn kull għaxar sidien għandhom biss propjetà waħda. Il-kiri huwa impenn part-time għal erba' minn kull ħames sidien.
3. 10% biss tal-inkwilini huma Maltin
L-età medja tal-popolazzjoni tal-inkwilini kienet ta' madwar 37 sena. Disa' minn kull għaxar inkwilini huma attivi fis-suq tax-xogħol.
4. Kemm is-sidien kif ukoll l-inkwilini jippreferu kuntratt ta' sena
Madankollu, madwar terz tal-parteċipanti huma favur kuntratti fuq żmien itwal, b'mod partikolari kuntratti ta' sentejn u tliet snin.
5. L-inkwilini għandhom it-tendenza li jirrappurtaw livelli ogħla ta' sodisfazzjon
L-inkwilini għandhom it-tendenza li jirrappurtaw livelli ogħla ta' sodisfazzjon mis-sidien bis-servizzi offruti mill-Awtorità tad-Djar, mill-aġenti tal-proprjetà immobbli u speċjalment bil-mod kif iħossu li d-drittijiet tagħhom qed jiġu protetti. Min-naħa l-oħra, ma kien hemm l-ebda differenza fil-livell ta' sodisfazzjon bil-kera riċevuta u mħallsa meta ġew imqabbla flimkien is-sidien u l-inkwilini.
6. Il-maġġoranza tas-sidien għandhom il-ħsieb li jġeddu l-kuntratt mal-inkwilini attwali
Madwar 3 minn kull 4 sidien iddikjarawli bi probabbiltà kbira kienu se jġeddu l-kuntratt tal-kiri mal-inkwilini attwali. Perċentwal simili ta' inkwilini esprimew ix-xewqa tagħhom li jġeddu l-kuntratt tagħhom mas-sid attwali tagħhom.
7. L-inkwilini huma anqas infurmati dwar id-drittijiet legali tagħhom mis-sidien
L-għarfien dwar l-Att dwar il-Kiri Residenzjali huwa ġeneralment ogħla fost is-sidien. B'mod ġenerali, il-parteċipanti kienu konxji dwar l-obbligi li jdawru l-kontijiet tal-utilitajiet, it-tkagħbir bl-użu, u t-tiġdid tal-kiri. Min-naħa l-oħra, hemm konfużjoni konsiderevoli dwar it-tul legali tal-kuntratti ta' spazji kondiviżi u l-possibbiltà li jiżdiedu l-prezzijiet tal-kera f'kuntratt ġdid. Il-parteċipanti mhumiex konxji wkoll tal-ħtieġa li tintuża ittra rreġistrata għat-terminazzjoni tal-kuntratt. In-nuqqas ta' għarfien tal-aspetti bażiċi tal-att dwar il-kiri residenzjali jindika potenzjal biex titjieb il-komunikazzjoni f'dan ir-rigward.